क्रान्ति केन्द्र सम्वाददाता
सप्तरीको तिलाठी कोइलाडी गाउँपालिकामा जन्मदर्ता गर्न छुटेकाहरुको लगत संकलन गरी जन्मदर्ता गराउने अभियान सञ्चालन गरिने भएको छ ।
युनिसेफको सहयोगमा तिलाठी कोइलाडी गाउँपालिकाले बाल संरक्षण कार्यक्रम अन्तर्गत उक्त अभियान संचालन गर्न लागेको हो । सो सम्बन्धमा मंगलबार पालिकाको कार्यालयमा जन्मदर्ता तथा घटना दर्ता सम्बन्धी अभिमुखीकरण कार्यक्रमको आयोजना गरियो ।
प्रथम चरणमा तिलाठी कोइलाडी गाउँपालिकाको वडा नं. ३, ४ र ५ मा स्वयमसेवक मार्फत जन्मदर्ता गर्न छुटेकाहरुको लगत संकलन गरिने बाल संरक्षण कार्यक्रमका सम्पर्क ब्यक्ति किशोर कुमार झाले बताए ।
तिलाठी कोइलाडी गाउँपालिकाको ८ वटै वडाका दर्ता किताबमा १५ हजार ७ सय ९ जनाको जन्मदर्ता कायम रहेको छ । पहिलो चरणमा तीनवटै वडामा स्वयमसेवकमार्फत लगत संकलन गरिने र त्यसपछि जन्म दर्ता गराइने कार्यक्रम रहेको सम्पर्क ब्यक्ति झाले बताए । स्वयमसेवकहरुमार्फत ब्यक्तिगत घटना दर्ता सम्बन्धी कानुनी ब्यवस्था सहितको पोष्टर पम्पलेट वितरण र माइकिङ्ग समेत गरिने कार्यक्रम रहेको सो अभिमुखीकरण कार्यक्रममा जानकारी गराइएको छ ।
कार्यक्रममा तिलाठी कोइलाडी गाउँपालिकाका प्रमुख प्रशासकीय अधिकृत सुरेन्द्र कुमार यादवले जन्म तथा ब्यक्तिगत घटना दर्ता सम्बन्धी कानुनी प्रावधानका बारेमा प्रस्तुतीकरण गरेका छन् ।
युनिसेफकी सुष्मा भट्टले कार्यक्रमको उद्देश्यको बारेमा जानकारी गराउँदै दोस्रो चरणमा बाँकी रहेका वडाहरुलाई समेत समेटिने बताईन् ।
तिलाठी कोइलाडी गाउँपालिकाका अध्यक्ष अरुण कुमार मण्डलको अध्यक्षतामा सो अभिमुखीकरण कार्यक्रम सम्पन्न भएको हो ।
