प्रवेश कुमार बाबुल / श्रवण वत्स
सप्तरीस्थित महेन्द्र विन्देश्वरी बहुमखी क्याम्पस राजविराजमा स्वतन्त्र विद्यार्थी युनियन (स्ववियु)को निर्वाचन सम्पन्न भएको छ । आज (आइतबार) भएको निर्वाचनमा कुल १ हजार ९ सय १५ जना मतदाता मध्ये ८३० जनाले मतदान गरेका छन् ।
बिहान ८ बजेदेखि शुरु हुने भनिएको उक्त निर्वाचन पोलिङ एजेन्ट ढिलो आउँदा आधा घण्टा पछि सुरु भएको मविव क्याम्पसका स्ववियु निर्वाचन अधिकृत रामअशिष यादवले बताए ।
मतदानको क्रममा केहीबेर गेट बाहिर नेविसंघ तथा अनेरास्वियुका विद्यार्थीहरुले चुनाव स्थगित गर्न माग गर्दै प्रदर्शन गरेका थिए । उनीहरुले प्रहरीमाथि ढुंगामुढा समेत गरेका थिए ।
अनेरास्ववियुबाट सभापतिका उम्मेदवारलाई अर्को विद्यार्थी संगठनले कुटेको पनि हल्ला मचेको थियो । चुनाव हुन्जेल बिचबिचमा प्रहरी र विद्यार्थीहरु बिच घम्साघम्सी भएको थियो । बाहिर होहल्ला हुँदा मतदाता भित्र आउन नसकेकाले आधा घण्टा मतदान रोकिएको निर्वाचन अधिकृतले यादवले बताए । यद्यपी पछि विद्यार्थी आएपछि केहीबेर मतदानको समय बढाइएको थियो ।
निर्वाचन अधिकृतले मतगणना आजै केहीबेर पछि सुरु गर्ने बताए । कुनै समस्या नभए भोलि बिहानसम्म मत परिणाम सार्वजनिक गरिस्कने तयारी रहेको उनले बताए ।
