क्रान्ति केन्द्र सम्वाददाता
सप्तरीको हनुमाननगर कंकालिनी नगरपालिका–१० का वडाध्यक्ष रामलखन मण्डलले स्वास्थ्यकर्मीमाथि दुर्व्यवहार गरेका छन् ।
वडाध्यक्ष मण्डलले मंगलबार कोभिड–१९ विरुद्धको खोप लगाइरहेका स्वास्थ्य चौकी इनर्वाका प्रमुख प्रमोदकुमार मण्डलमाथि दुर्व्यवहार गरेको जनाइएको छ । ‘खोप लगाइरहेको बेला हैकमवादी शैलीमा प्रस्तुत हुँदै वडाध्यक्ष मण्डलले आफुलाई दुर्व्यवहार गर्नुभयो’ प्रमुख प्रमादले भने, ‘कसलाई सोधेर खोप लगाउन सुरु गरेको भन्दै अपशब्द नै प्रयोग गर्नुभयो ।’
प्रमुख प्रमोदले पछि वडाध्यक्षले आफ्नो कक्षमा बोलाएर पनि अनावसनाव भनेको बताए । ‘कोभिड–१९ विरुद्धको खोप अत्यावश्यक कार्य रहेकोले आफ्नो दायित्व निर्वाह गरिरहेको भनिरहदा पनि उहाँ उग्र भएर अनावसनाव सुनाइरहनुभयो’ उनले भने, ‘स्वास्थ्यतर्फको अत्यावश्यक कार्यमा उहाँलाई बाँधा पुर्याउनु छ भने मलाई भन्नु केही छैन् तर अत्यावश्यक कार्य गरिरहदा पनि दुर्व्यवहार खेप्नुपर्दा दुःखी छु ।’
घटनापछि आफुले स्वास्थ्य शाखामा पनि जानकारी गराइसकेको बताए । यस्ता घटनाले समग्र स्वास्थ्यकर्मीको मनोबल कमजोर भएको प्रमुख मण्डलले बताए ।
उता, गत आइतवारदेखि नै जनप्रतिनिधिको व्यवहारप्रति असन्तुष्ट रहेका नगरपालिका कार्यालय र मातहतका कर्मचारीहरु आन्दोलित रहेका छन् । कर्मचारीहरुले संयुक्त रुपमा विज्ञप्ति नै जारी गरी जनप्रतिनिधिहरुले सार्वजनिक रुपमा चरित्र हत्या गरेको र अभद्र व्यवहार गर्ने गरेको आरोप लगाउँदै अत्यावश्यक सेवा बाहेकका कामकाज ठप्प पारेका छन् ।
वडाध्यक्ष रामलखनले शिक्षा मात्रै सुचारु रहेको बेला कार्ड बनाइरहेको पाइएपछि सोधखोज गरेको बताए । ‘स्वास्थ्य सेवा बन्द रहेको बेला कार्ड किन बनाइरहेको थियो?, शिक्षा मात्रै सुचारु छ, अहिले स्वास्थ्य सेवा पनि बन्द छ’ वडाअध्यक्षले भने, ‘मैले त्यहीँ भने तपाईहरुले स्वास्थ्य सेवा बन्द गरेको बेला चोरी गरेको जस्तो कार्ड किन बनाइरहनुभएको छ, मैले दुर्व्यवहार गरेको छैन् ।’
