प्रवेश कुमार बाबुल
क्षण्डै ढेड दशकपछि हुन लागेको स्वतन्त्र विद्यार्थी युनियनको निर्वाचनको लागी शनिबार सप्तरीको महेन्द्र विन्देश्वरी बहुमुखी क्याम्पस राजविराजमा ७ वटा विद्यार्थी संघ/संगठनका ३८ जनाले प्रत्यक्ष तर्फका पदमा उम्मेदवारी दर्ता गराएका छन् । जसमध्ये सभापति पदमा ५ जनाले उम्मेदवारी दर्ता गराएका छन् भने सचिव, कोषाध्यक्ष तथा सदस्यको पदमा ३३ जनाले उम्मेदवार रहेका छन् ।
अनेरास्ववियु युनियनबाट सभापतिमा रंजिव साह, कोषाध्यक्षमा मनिषा कुमारी साह र सचिवमा सत्यनारायण चौधरीले उम्मेदवारी दर्ता गराएका छन् ।
त्यस्तै, समाजवादी विद्यार्थी युनियनबाट सभापतिमा रंजित कुमार यादव, कोषाध्यक्षमा मेनुका साह, सचिवमा सुनिल कुमार मंडल, नेपाल विद्यार्थी संघबाट सभापतिमा महेश कुमार यादव, कोषाध्यक्षमा टिना कुमारी आनन्द, सचिवमा राजेन्द्र प्रसाद साह, विद्यार्थी जनमत संघबाट सभापतिमा रामभजन मंडल, कोषाध्यक्षमा पुरुषोत्तम राम, सचिवमा मनोज कुमार साह र आम विद्यार्थी मोर्चाबाट सभापतिमा डोली कुमारी दासले उम्मेदवारी दर्ता गराएकी छिन् ।
समाजवादी विद्यार्थी संघ, लोकतान्त्रिक विद्यार्थी संघ र अखिल क्रान्तिकारीबिच गठबन्धन भएको समाजवादीका सभापति उम्मेदवार रंजित कुमार यादवले जानकारी दिए । विद्यार्थी जनमत संघबाट उपसभापति पदमा उम्मेदवारी दिएका आनन्द कुमार शर्माको उम्मेदवारी प्रत्यक्ष तर्फ उपसभापति पद नरहेकोले बदर भएको निर्वाचन अधिकृतले जनाएको छ ।
निर्वाचन अधिकृतले सचिव पदमा मनोनयन दर्ता गराएका राष्ट्रिय विद्यार्थी परिषद्का विनय कुमार यादवले उम्मेदवारी फिर्ता लिएको जनाएको छ । समानुपातिक तर्फ ६ वटा संगठनले मनोनयन दर्ता गराएको निर्वाचन अधिकृतले जनाएको छ ।
