क्रान्ति केन्द्र सम्वाददाता
तिलाठी कोइलाडी गाउँपालिकाको तीन वटा वडामा ग्रामीण महिलाका लागि आर्थिक सशक्तिकरण कार्यक्रम सञ्चालन गरिने भएको छ ।
गाउँपालिकाको वडा नम्बर ३ सकरपुरा, वडा नम्बर. ४ कोइलाडीको चट्टीटोल, कुशहाको मुसहरि टोल र मुखिया टोल तथा वडा नम्बर ५ को बर्साइन, कुशहा, साह, पंडित टोल र राय टोलमा उक्त कार्यक्रम सञ्चालन गरिने गाउँपालिकाका अध्यक्ष अरुण कुमार मण्डलले बताएका छन् ।
तीन वटै वडाका छनौटमा परेका टोलका दलित तथा अति विपन्न परिवारहरु चयन गरी महिलाहरुका लागि आर्थिक सशक्तिकरणको कार्यक्रम सञ्चालन गरिने अध्यक्ष मण्डलले जानकारी दिए ।
संयुक्त राष्ट्र संघीय निकायहरु विश्व खाद्य कार्यक्रम, युएन ओमन, खाद्य तथा कृषि संगठन र आईएफएडिको सहयोगमा तिलाठी कोइलाडी गाउँपालिकाको तीन वटा वडाका दलित तथा अति विपन्न परिवारलाई लक्षित गरि कार्यक्रम सञ्चालन गरिने गाउँपालिकाका कार्यक्रम अधिकृत राजेश कुमार झाले जानकारी दिए ।
तिलाठी कोइलाडी गाउँपालिकामा गाउँपालिकाका अध्यक्ष अरुण कुमार मण्डल तथा वडा अध्यक्षहरु र संयुक्त राष्ट्र संघीय निकायहरु विश्व खाद्य कार्यक्रम, युएन ओमन, खाद्य तथा कृषि संगठन र आईएफएडिका प्रतिनिधीहरुको मंगलबार सम्पन्न बैठकबाट कार्यक्रम सञ्चालन गरिने वडाहरु चयन गरिएको कार्यक्रम अधिकृत झाले बताए ।
