काठमाडौँ । देशैभर आज ७३औं प्रजातन्त्र दिवस विभिन्न कार्यक्रम गरी मनाइँदै छ ।
विक्रम संवत् २००७ सालको क्रान्ति सफल भएर १०४ वर्ष लामो निरंकुश राणाशासन अन्त्य भई प्रजातन्त्र स्थापना भएको सम्झनामा हरेक वर्ष फागुन ७ गते प्रजातन्त्र दिवस मनाउने गरिएको छ ।
मुलुकको सार्वभौमसत्ता जनतामा निहित हुनुपर्छ भन्ने मान्यतालाई जनताको संघर्ष तथा शहीदको बलिदानबाट स्थापित यो ऐतिहासिक दिन रहेको मान्यता छ ।
प्रजातन्त्र, लोकतन्त्र हुँदै मुलुकमा अहिले संघीय लोकतान्त्रिक गणतन्त्रात्मक शासन व्यवस्था स्थापना भएको छ ।
राष्ट्रपति, उपराष्ट्रपति, प्रधानमन्त्रीलगायतले दिवसको अवसरमा सबै नेपालीहरुमा शुभकामना दिएका छन् ।
