क्रान्ति केन्द्र सम्वाददाता
विकास क्षेत्रमा नेपाल -भारत सहकार्य विषयको बिचार गोष्ठी शनिबार राजबिराजको नगरपालिका हलमा सम्पन्न भएको छ । राष्ट्रिय एकता अभियान सप्तरीले आयोजना गरेको गोष्ठी कार्यक्रममा अध्यक्षता राष्ट्रिय एकता अभियान सप्तरीकी संयोजक सुनिता चौधरी , प्रमुख अतिथि नेपाली काँग्रेस जिल्लाका उपसभापति रामकुमार यादव र विशिष्ठ आतिथि राष्ट्रिय एकता अभियानकी केन्द्रिय उपाध्यक्ष सुनिता साह रहेकी थिइन् ।
कार्यक्रममा बोल्दै बक्ताहरुले नेपाल भारतको सम्बन्ध आज देखी नभई सदियौं देखी रहेको बताएका थिए। त्रेतायुगमा नेपलाकी छोरी माता सिता र भारतका छोरा भगवान श्रीरामको विवाह समेत भएको उनीहरुले स्मरण समेत गराएका थिए ।
नेपालको भारतसँग पारिवारिक, व्यापारीक, धार्मिक सम्बन्ध समेत सदिऔं देखी जोडिएकाले यस्ता सम्बन्धलाई अझ मजबुत बनाउन सबैलाई आ–आफ्ना ठाउँबाट सकारात्मक भूमिका खेल्नु पर्ने्मा वक्ताहरुले जोड दिए ।
आयोजित गोष्ठीमा नेपालका विभिन्न जिल्लाहरुमा भारत सरकारले गरेकोे विभिन्न सहयोग स्वागत योग्य रहेको भन्दै वक्ताहरुले यस्ता सहयोग आगामी दिनहरुमा निरन्तर रहने विश्वास समेत व्यक्त गरेका थिए । उनीहरुले भारत सरकारले नेपालको शिक्षा, स्वास्थ्य लगायतका क्षेत्रमा निरन्तर सहयोग गरिरहेको स्मरण गराउँदै यस्ता सहयोगले मुलुकको विकासमा ठुलो टेवाा पुगेको बताए ।
सो कार्यक्रममा हरिदेव राम, राहुल रजक, प्रमिला साह, प्रविण बानु, डम्बर नारायण साह, यूवा नेता दिपेन्द्र चौधरी, बरिष्ठ पत्रकार अनिल कुमार अनल, पत्रकार दिनानाथ यादव, पूर्वप्रअ नथुनी दास, किरण कुमारी राय, अर्जुन कुमार यादव लगायतले नेपाल भारतबीचको सम्बन्ध र नेपालको विकासमा भारतले पुर्याएको योगदान बारे चर्चा गरेका थिए ।
सोही गोष्ठीमा अभियानका सल्लाहकार सागरविर कडारीले नेपाल भारत सहकार्य सम्बन्धी दस्तावेज प्रस्तुत गरेका थिए ।
