क्रान्ति केन्द्र सम्वाददाता
सप्तरीको तिलाठी कोईलाडी गाउँपालिका- १ तिलाठीमा सरस्वती पूजाको अवसरमा बनेको मुर्ति बिसर्जन गरिएको छ । पञ्चमी देखि ६ दिन पछि बुधबार विद्याकी देवी सरस्वतीको मूर्ति बिसर्जनसँगै मेला सम्पन्न भएको हो । तिलाठी बासीहरुले गाउँमै चन्दा संकलन गरेर यसरी सरस्वती पुजालाई महोत्सवको रुपमा मनाइने एक सत्बादी भन्दा लामो इतिहास छ ।
ऐतिहासिक सरस्वती पूजा महोत्सवमा साँस्कृतिक कार्यक्रम, नाटक मंचन, कुस्ती प्रतियोगिता लगायतका बिभिन्न कार्यक्रमहरुको आयोजना गरिदै आएको छ । यस बर्ष पनि मेलाको रौनकको केन्द्र रहेको कुस्ती प्रतियोगिताको चार दिन आयोजना गरिएको थियो । जसमा नेपाल र भारतबाट आएका पहलवानहरुले प्रतियोगिता गरेका थिए ।
रात्रीकालिन समयमा श्री सरस्वती साँस्कृतिक नाट्यकला परिषद र श्री हरगौरी नाट्यकला परिषदले २/२ वटा नाटक मंचन गरेका थिए । धार्मिक र समाजिक नाटकबाट उनीहरूले धर्मको प्रचार र समाजमा चेतना फैलाउने गरेको नाट्यकला परिषदले जनाएको छ ।
सरस्वती पुजाको अवसरमा तिलाठीमा नाटक मंचनको इतिहास पनि पुजा सँगैको रहेको छ । जसलाई बिक्रम सम्बत २००१ साल देखि श्री सरस्वती साँस्कृतिक नाट्यकला परिषद र विक्रम सम्वत २०३६ साल देखि श्री हरगौरी नाट्यकला परिषद नामको दुई स्थानीय संस्थाले निरन्तरता दिएको छ ।
यस पुजाको अवसरमा तिलाठी एक्स जेनेरेसन नामक समुहले चर्चा परिचर्चा कार्यक्रम गरेका थिए ।
जसमा उनीहरूले शिक्षा, स्वास्थ्य, रोजगार, कृषि, विकासका बिषयमा सम्बन्धित विषयको विज्ञसँग छलफल गरेका थिए ।
