क्रान्ति केन्द्र सम्वाददाता
सप्तरीको तिलाठी कोईलाडी गाउँपालिका–४ कोईलाडीमा जारी टि–२० सिरिजको फाईनल खेलमा सोमबार तिलाठीले तोपालाई ४९ रनले हराउँदै कपमाथि कब्जा गरेको छ ।
कोईलाडी मैदानमा भएको फाइनल खेलमा तिलाठी टिमले टस जितेर पहिले व्याटिङ्गको निर्णाय गरेका थिए । तिलाठीले निर्धारित २० ओभरमा ५ विकेटको क्षतिमा १८४ रनको स्कोर तयार पारेको थियो ।
तिलाठीको तर्फबाट सर्वाधिक आशिक मिश्रले ६४ रनको आफ्ना टिमका लागी योगदान दिएका थिए । त्यस्तै, रेवतीले ४०, शिवले १५ र दिनेश यादवले १७ रनको योगदान आफ्ना टिमका लागि दिएका थिए ।
१८५ रनको लक्ष्य लिएर ओर्लेका तोपाले आफ्ना सम्पूर्ण विकेटको क्षतिमा मात्र १३५ रन जोड्न सके । तिलाठी तर्फबाट बोलिङ्गमा बिष्णु मण्डल आफ्ना ४ ओभरका स्पेलमा मात्र २३ रन खर्चिदै महत्वपूर्ण ४ विकेट लिएका थिए । त्यस्तै, मिथुनले ३ र शिव कामैतले २ विकेट हात पारेका थिए ।
खेलको ‘म्यान अफ द मैच’ र ‘म्यान अफ द सिरीज’ तिलाठी टिमका बिष्णु मण्डल घोषित भएका थिए । बेष्ट ब्याट्सम्यान तिलाठीका आशिक मिश्र र वेष्ट बोलिङ्ग तिलाठीका शिव कामैत घोषित भएका थिए । विजेता टिमलाई तिलाठी कोईलाडी गाउँपालिकाका अध्यक्ष अरुण कुमार मण्डलको हातबाट नगद १५ हजार र सिल्ड प्रदान गरेका थिए ।
