क्रान्ति केन्द्र सम्वाददाता
सप्तरीको तिलाठीकोइलाडी गाउँपालिका-२ लौनियामा क्रिकेट प्रतियोगिता-२०७९को उद्घाटन गरिएको छ । लौनिया युथ क्रिकेट समितिको आयोजना तथा तिलाठीकोइलाडी गाउँपालिका वडा नम्बर २को सहयोगमा हुन लागेको यस प्रतियोगिताको बिहिबार एक कार्यक्रम बिच उद्घाटन गरिएको हो । कार्यक्रममा बोल्दै प्रमुख अतिथि मधेश प्रदेशसभा सदस्य सतिश कुमार सिंहले आयोजक लगायत खेलाडीहरुसँग क्रिकेट टेनिस बलले नभई ड्युज बलले खेल्न खेलाउन आग्रह गरे । ‘क्रिकेटको आयोजना कम भएपनि खेलमा ड्युज बलको प्रयोग गर्नुस्’ उनले भने ‘यसले खेल्ने स्तर सुध्रिन्छ र खेलाडीले पनि राष्ट्रिय स्तरका खेल खेल्ने मौका पाउनेछन् ।’
उनले प्रदेश सभा सदस्यको रुपमा तथा आफ्नो व्यक्तिगत तर्फबाट खेलमा गर्न सक्ने सहयोग गर्ने बाचा गरे । तिलाठीकोइलाडी गाउँपालिकाका निवर्तमान अध्यक्ष समेत रहेका सिंहले विकासको काममा पालिकालाई आवश्यक सहयोगको लागि सदैव तत्पर रहने प्रतिबद्धता समेत व्यक्त गरे ।
आयोजक समितिका श्रीकान्त मंडलको अध्यक्षता भएको उक्त कार्यक्रममा तिलाठीकोइलाडी गाउँपालिकाका अध्यक्ष अरुण कुमार मंडल, वडा नम्बर १ वडाअध्यक्ष दिनेश्वर मिश्र, वडा नम्बर २का अध्यक्ष कमल कुमार मंडल, वडा नम्बर ५ का अध्यक्ष ललन प्रसाद राउत, वडा नम्बर २का निवर्तमान अध्यक्ष खगेन्द्र मंडल लगायतका व्यक्तिहरुले मन्तव्य राखेका थिए । कार्यक्रम स्थानीय बुद्धिजीवी, खेलप्रेमी, राजनीतीकर्मी लगायतका व्यक्तिहरुको उपस्थिति रहेको थियो ।
१६ टिम सहभागी रहेको उक्त प्रतियोगितामा पहिलो खेल बिहिबार बाबा महन्थ युवा क्लब, फर्सैठ र बजरंगबली युवा क्रिकेट टिम,मुसहरनीया बिच खेलिएको थियो । टस जितेर ब्याटिङ गर्दै फर्सैठले निर्धारित २० ओभरको खेलमा १६ ओभर ५ बलमै सम्पुर्ण विकेट गुमाउँदै १४६ रनको लक्ष्य मुसरहनियालाई दिएको थियो । मुसहरनियाले १५ ओभर ४ बलमा ६ विकेट गुमाउँदै निर्धारित लक्ष्य प्राप्त गरेका थिए । खेलमा उत्कृष्ट प्रदर्शन गर्ने मुसहरनियाका जितेन्द्र मंडल ‘म्यान अफ दि म्याच’ घोषित भएका थिए । यो प्रतियोगिता १५ दिन सम्म चल्ने आयोजकले जनाएको छ।
