क्रान्ति केन्द्र सम्वाददाता
नेपाल पत्रकार महासंघ शाखा सप्तरीले ‘लोकेन्द्र स्मृति पत्रकारिता पुरस्कार’को लागि तीन सदस्यीय पुरस्कार छनौट समिति गठन गरेको छ । सोमबार बसेको कार्यसमिति बैठकले समिति चयन गरेको महासंघले प्रेस विज्ञप्ति मार्फत जनाएको छ । समितिको संयोजकमा शाखाको पुर्व अध्यक्ष बिष्णु कुमार मंडल र सदस्यमा बैद्यनाथ यादव र सुधा देव रहेका छन् । पुरस्कारको लागि आवेदन दिन पुस १८ गते देखि २३ गते सम्मको समय रहेको महासंघले जनाएको छ ।
प्रत्येक बर्षको पुस २६ गते सप्तरीको स्वर्गीय पत्रकार लोकेन्द्र बुढाथोकी स्मृति दिवस मनाइने गरिन्छ । सोही अवसरमा सप्तरीलाई कार्यक्षेत्र बनाएर पत्रकारिता गर्दै आएका एकजनालाई पुरस्कार समेत दिने गरिन्छ । यस बर्ष पनि पुस २६ गते २९ औं स्मृति दिवस मनाइने महासंघ शाखा सप्तरीले जनाएको छ ।
पुरस्कारको आवेदनको लागि व्यक्तिगत विवरण सहितको निवेदन र गत वर्षको पुस २७ गते देखि यस बर्षको पुस १८ गते सम्म प्रकाशित कम्तीमा तीन वटा समाचार महासंघमा बुझाउन महासंघको सुचनामा भनिएको छ ।
रेडियो र टेलिभिजनको पत्रकारले समाचार सामग्री महासंघको मेलमा पठाउन सक्ने व्यवस्था रहेको महासंघले जनाएको छ ।
