क्रान्ति केन्द्र सम्वाददाता
सप्तरी जिल्लाको हनुमाननगर कंकालिनी नगरपालिका वडा नम्बर -०१ स्थित कोशी ब्यारेजको गोल घर देखी ५०० मिटर उत्तर -पुर्वबाट बिहिबार प्रहरीले २७ बोरा तयारी गाँजा बरामद गरेको छ । जिल्ला प्रहरी कार्यालय, सप्तरीले शुक्रबार पत्रकार सम्मेलन गर्दै प्रति बोरा ३० केजीको दरले जम्मा ८ सय १० केजी गाँजा बरामद गरेको जनाएको छ । कोशी भंगालको पुर्व टापुको एकान्त ठाउँमा बालुवा पुरी गाँजा राखिएको भन्दै आएको बिशेष सुचनाको आधारमा जिल्ला प्रहरी कार्यालय सप्तरीबाट प्रहरी निरीक्षक प्रमोद खड्काको नेतृत्वमा खटिएको प्रहरी टोलीले बेलुका ७ बजेर ३० मिनेटमा गाँजा बरामद गरेको प्रहरीले जनाएको छ । बालुवा भित्र खन्दा तीन ठाउँबाट १२ , ९ र ६ बोरा गरी जम्मा २७ बोरा गाँजा तयारी अवस्थामा फेला पारेको प्रहरीले जनाएको छ । बेबारीसे अवस्थामा फेला पारेको गाँजा नियमानुसार बरामद गरी सुक्ष्म अनुसन्धान कार्य भईरहेको प्रहरीले जनाएको छ ।
यति ठुलो मात्रामा गाँजा बरामद हुनु उपलब्धी सँगसँगै चुनौती समेत रहेको जिल्ला प्रहरी कार्यालय सप्तरीका प्रहरी उपरीक्षक अवि नारायण काफ्लेले बताएका छन् ।
