श्रवण वत्स
सप्तरीको तिलाठी कोइलाडी गाउँपालिकामा करोडौं मुल्य बराबरको गाडीहरु प्रयोग विहिन अवस्थामा थन्काएर राखिएको छ । गाउँपालिकाले खरिद गरेको ४ वटा ट्रयाक्टर र एउटा सेफ्टी ट्यांक गाउँपालिका परिसरमा विगत ८ /९ महिना देखि थन्केको अवस्थामा छ ।
गाउँपालिका नयाँ अध्यक्ष आएको दिन देखी नै प्रयोग विहिन अवस्थामा परिसर भित्र ट्रयाक्टर र सेफ्टी टयांक थन्केर राखेको छ । प्रयोगमा नआउँदा कति ट्राक्टरहरुको लाइट समेत फुटेको छ र कतिको सिट र माथीको छाना समेत च्यातिसकेको छ । अहिले सो गाडीहरु स-साना बालबालिकाहरुको खेल्ने सबारीमा परिणत भएको छ ।
विगतका समयमा संचालनमा रहेको ट्रयाक्टर स्थानीय तहको निर्वाचन यता थन्काएर राखिएको त्यहाँका एक स्थानीयले बताएका छन् । गाउँपालिका परिसरमा राखिएका ती ट्रायक्टरहरुमा नम्बर प्लेट समेत रहेको छैन् । सुत्रका अनुसार प्रयोगमा रहेको समयमा पनि ट्रायक्टरमा कहिले नम्बर प्लेट रहेको थिएन ।
गाउँपालिकासँग पनि सेफ्टी ट्यांक रहेको बारेमा गत स्थानीय निर्वाचन पूर्व त्यहाँका स्थानीयहरुलाई थाहा पनि थिएन । नयाँ जनप्रतिनिधिहरुको पदभार ग्रहणको भोलीपल्ट नै गाउँपालिका परिसरमा अचानक सेफ्टी ट्यांक ल्याएर राखिए । कहिले खरीद भएको र यति दिन सम्म कहाँ थियो भनेर स्थानीयबासीलाई थाह समेत छैन ।
‘सेफ्टी ट्यांक विगतकै अध्यक्षकोे पालामा खरिद भएको थियो, ट्राक्टर र सेफ्टी टयांक सँगसँगे खरिद भएको हो ।’ गाउँपालिकाका सूचना अधिकारी राजेश झाले भने ।
गाउँपालिका अध्यक्ष अरुण मण्डलले गाउँपालिकाबाट भुक्तानी भएको गाडीहरु गाउँपालिकाका नाममा नरहेको बताए । ‘निवर्तमान गाउँपालिका अध्यक्ष सतिश कुमार सिंहले आफ्नो भद्रकाली ईन्टरप्राजेजबाट खरिद गरेको थियो ,तर गाउँपालिकाबाट भुक्तानी समेत भईसकेको गाडीको अहिले सम्म गाउँपालिकाको नाममा समेत नामसारी भएको छैन ।’ उनले भने ‘विना नामसारीको गाडी कसरी चलाउने हो ।’
उनले बिना ईन्सोरेन्स र कर चुक्ताको हामी कसरी प्रयोगमा ल्याउने भन्दै अरुको नामको गाडीलाई गाउँपालिका किन कर र ईन्सोरेन्स बुझाउने अध्यक्ष मण्डलले भने ।
‘गाउँपालिकामा रहेको एम्बुलेन्स जिर्ण अवस्थामा थिए, त्यसलाई हामीले अहिले मर्मत गराई सञ्चालनमा ल्याईसकेको छौँ ।’ उनले भने ‘अन्य गाडीको बिषयमा चाँडै निर्णय गर्ने छौँ ।’
गाउँपालिका प्रशासकीय अधिकृत सुरेन्द्र यादवले गाउँपालिका भित्र ट्र्याक्टरको कुनै काम नरहेको बताए । ‘यस भन्दा पहिला के कामको लागि खरिद भएको मलाई थाह भएन तर अहिलेको अवस्थामा ट्राक्टरहरुको काम छैन’ अधिकृत यादवले भने ‘जति बेला काम हुन्छ हामी गाडीलाई प्रयोगमा ल्याउँछौैँ ।’
क्रान्ति केन्द्रसँगको सम्वादमा गाडीको भुक्तानी गाउँपालिकाबाट भएको तर अहिलेसम्म किन गाउँपालिकाको नाममा गाडीहरु नआएको प्रश्न मा अधिकृत यादवले भने “म भन्दा पहिले खरिद भएको हो, म यहाँ आएको ३/४ महिना मात्र भएको हो, गाउँपालिकाबाट भुक्तानी भएको छ कि छैन, मलाई थाह पनि भएन । सेफ्टी टयांकलाई हामी यथास्रिघ सञ्चालनमा ल्याउने तयारीमा छौं ।’
गाडीको भुक्तानीको विषयमा गाउँपालिका सहायक अधिकृत राजु कुमार झाले ‘अहिले लेखापाल नभएर हामीलाई जानकारी दिन मल्दैन, गाडीको सबै कागजातहरु लेखापालको केबिनमा हुन्छ, त्यसलाई हामीलाई निकाल्न मिल्दैन, लेखापाल आएपनि मात्रै हामी दिनसक्छौं ‘ भने ।
