क्रान्ति केन्द्र सम्वाददाता
सप्तरी जिल्लाको छिन्नमस्ता गाउँपालिकाले आयोजना गरेको तीन दिवसीय निःशुल्क आँखा शिविर सम्पन्न भएको छ । आइतवार तेश्रो दिन छिन्नमस्ता- ६ कोचाबखारीमा शिविर सञ्चालन गरिएको थियो । उक्त शिविर सम्पन्न भएसँगै तीन दिवसीय नि: शुल्क आँखा शिविर कार्यक्रम सम्पन्न भएको छ
शिविरमा नोवेल शिक्षण अस्पताल बिराटनगरका बरिष्ठ डा. रमेश विक्रम केसीको नेतृत्वमा डाक्टरहरुले सेवा प्रदान गरेका थिए । आइतबार कोचाबखारी स्थित रहेको स्वास्थ्य चौकीमा बिहान ११ बजे देखी ३ बजे सम्म शिविरबाट सेवा प्रदान गरिएको थियो । सो शिविरमा चेक जाँच गराएका ५१० जना मध्ये ४० जनाभन्दा बढीलाई मोतियाबिन्द फेला परेको थियो ।
मोतियाविन्द फेला परेका विरामीहरुलाई अप्रेसन गर्न आफ्नो पूर्जा लिएर नोवेल अस्पताल आएमा उपचारमा लाग्ने खर्चमा सुविधा समेत दिने डा. केसीले बताए । शिविरमा विरामीहरुलाई निःशुल्क औषधि र ३ सय भन्दाबढी जनालाई चश्मा समेत उपब्लध गराइएको जनस्वास्थ्य निरिक्षक पंकज कुमार यादवले जानकारी दिए ।
तिन दिवसीय शिविर सफलता पूर्वक समाप्त भएको अवसरमा छिन्नमस्ता गाउँपालिका अध्यक्ष विद्यानन्द चौधरीले डाक्टरहरुलाई मायाको चिनो प्रदान गरी सम्मान गरेका थिए ।
सो अवसरमा गाउँपालिकाका अध्यक्ष चौधरी, वडा नम्बर ६ का वडा अध्यक्ष कपिलेश्वर साह, स्वास्थ्य संयोजक मदनेश्वर प्रसाद चाौधरी, सह–संयोजक दिपेन्द्र प्रसाद यादव, जनस्वास्थ्य निरिक्षक पंकज कुमार यादव लगायतको उपस्थति रहेको थियो ।
त्यस्तै शुक्रबार र शनिवार सोही गाउँपालिकाका वडा नम्बर ३ सखडा र वडा नम्बर ५ लोखरममा शिविर सञ्चालन गरिएको थियो ।
