क्रान्ति केन्द्र सम्वाददाता
कतारमा जारी २२ औ संस्करणको फुटवल विश्वकप २०२२ को फाइनल खेल आज राति ८ बजेर ४५ मिनेटमा शुरु हुँदैछ । सो खेलमा दुई पटक विश्वकप विजेताहरु तेस्रो पटक उपाधिको लागि अर्जेन्टिनाका र फ्रान्स भिड्दैछन् ।
सो फाइनल खेल कतारको लुसियल आइकनिक स्टेडियममा हुनेछ । अर्जेन्टिनाले सेमिफाइनलमा क्रोएशियालाई पराजित गरेको थियो भने फ्रान्सले मोरोक्कोलाई पराजित गरेर फाइनलको यात्रा गरेको थियो ।
नेपलाका दर्शकहरुलाई समेत ठाउँ ठाउँहरुमा फाइनल हेर्नको लागि प्रोजेक्टरको व्यवस्था गरेका छन । कतिपय सिनेमा हलहरुमा समेत फाइनल खेल हेराउने व्यवस्था रहेको छ ।
दुबै प्रतिद्वन्द्वी दुई पटक विश्वकप विजेता
विश्वकपको इतिहासमा फ्रान्स र अर्जेन्टिना दुबैले दुई दुई पटक विश्वकप जितिसकेका छन् । फ्रान्सले सन् १९९८ र सन् २०१८ मा विश्वकप जितेको थियो । अर्जेन्टिनाले भने सन् १९७८ र सन् १९८६ मा विश्वकप जितेको थियो । यस बाहेक अर्जेन्टिना सन् १९३०, १९९० र २०१४ गरी तीन पटक विश्वकपको फाइनलमा पुगिसकेको छ । यी विश्वकपमा अर्जेन्टिना उपविजेता भएको थियो । फ्रान्स सन् २००६ विश्वकपको उपविजेता बनेको थियो । यो फाइनल अर्जेन्टिनाको छैठौँ फाइनल खेल हो भने फ्रान्सको चौथो फाइनल हो ।
यस अघि फ्रान्स र अर्जेन्टिना बीच कुल १२ खेल भइसकेको छ । जसमध्ये ६ खेलमा अर्जेन्टिनाले फ्रान्सलाई पराजित गरेको छ भने फ्रान्सले ३ खेलमा जित हासिल गरेको छ । यी दुई बीचको बाँकी ३ खेल बराबरीमा सकिएको छ ।
गोल्डन बुटको दाबेदारहरु समेत दुई जना बीच भिडन्त
फाइनल खेल ‘गोल्डन बुट’ का चार दाबेदार बीचको भिडन्त हो । गोल्डन बुटको प्रतिस्पर्धामा अर्जेन्टिनाका मेस्सी र फ्रान्सका एम्बाप्पे ५ गोलसहित शीर्ष स्थानमा छन्। त्यसैगरी, अर्जेन्टिनाका अल्भारेज र फ्रान्सका जिरुड ४ गोलसहित दोस्रो स्थानमा छन्। फाइनलको सो खेल अर्जेन्टिनाका कप्तान लियोनल मेस्सीको अन्तिम खेल हुने बताइएको छ।
विश्वकपमा अर्जेन्टिनाको प्रदर्शन
चालु विश्वकपमा अर्जेन्टिनाको पहिलो खेलमा साउदी अरेबियाले पराजित गरेको थियो। तर, त्यसपछि यस टिमले कुनै खेल हारेको छैन । उनले प्रि क्वाटरफाइनलमा अष्ट्रेलियालाई २–१ ले पराजित गरेको थियो भने क्वाटरफाइनलमा नेदरल्याण्डलाई ४–३ ले पराजित गरेको थियो। त्यसैगरी, सेमिफाइनलमा अर्जेन्टिनाले क्रोएशियालाई ३–० ले हराएको थियो ।
विश्वकपमा फ्रान्सको प्रदर्शन
कतारमा जारी विश्वकप २०२२ को समूहचरणको तीन खेलमध्ये फ्रान्सले दुई खेलमा जित हासिल गरेको थियो भने एक खेलमा हार व्यहोरेको थियो । फ्रान्सले अष्ट्रेलिया र डेनमार्कलाई हराएको थियो भने ट्यूनेशियासँग पराजयको सामना गरेको थियो । फ्रान्सले प्रि क्वाटरफाइनलमा पोल्याण्डलाई ३–१ ले हराएको थियो भने क्वाटरफाइनलमा इङ्गल्याण्डलाई २–१ ले पराजित गरेको थियो। सेमिफाइनलमा मोरोक्कोलाई २–० ले पराजित गर्दै फ्रान्स फाइनलमा पुगेको हो ।
