श्रवण वत्स
सप्तरी जिल्लाको कञ्चनरुप नगरपालिका- ११ गोरपारमा आगो लाग्दा २० लाखभन्दा बढीको क्षति भएको छ ।
बुधबार स्थानीय अर्जुन मण्डलको घरमा विद्युत सर्टहुँदा लागेको आगोले काठको दुई तल्ले घर, एउटा गोठाला र छिमेकी ठेकनारायण मण्डलको एउटा घर जलेर नष्ट भएको जिल्ला प्रहरी कार्यालय सप्तरीका प्रवक्ता प्रहरी नायव उपरीक्षक नरेश कुमार सिंहले जानकारी दिए ।
अर्जुन मण्डलको घरमा कोही नभएको समयमा लागेको आगोले घर भित्र रहेका धान, चामल, दाल,४७ तोला चाँदी , एक तोला सुनको गहना र नगद १ लाख समेत जलेर नष्ट भएको सिंहले बताए ।
मण्डल आफू विरामी भएर काठमाण्डौंमा ईलाज गराई रहेका छन । मण्डलका आमा र बुहारी कामका लागि बाहिर गएकोबेला मिटरबाट एक्कासी आगो लागेको स्थानीय रामदेव मण्डले बताए ।
त्यस्तै ठेकनारायण मण्डलको घर भित्र रहेका २५ हजारको प्लाई र लत्ताकपडा जलेर नष्ट भएको जनाइएको छ ।
आगो स्थानीय, नेपाल प्रहरी र कञ्चनरुप नगरपालिकाका दमकलको सहयोगमा ४५ मिनेट पछि नियन्त्रणमा आएको प्रवक्ता सिंहले बताए ।
कञ्चनरुप नगरपालिका नगर प्रमुख ललन कुमार गुप्ताले “आगो लागेको सुनेर म त्यहाँ पुगेको थिए, व्यक्तिगत र नगरपालिकाबाट पिडितलाई जे जति सहयोग हुन्छ गर्छु” भने ।
