क्रान्ति केन्द्र सम्वाददाता
जनता समाजवादी पार्टी (जसपा) नेपालका प्रवक्ता मनिषकुमार सुमनले निर्वाचनमा हारको त्रासका कारण प्रतिस्पर्धीहरुले अर्नगल प्रचारबाजी गर्दै हिँडेको बताएका छन् ।
सोमवार राजविराजमा पत्रकार सम्मेलन गर्दै उनले सप्तरी निर्वाचन क्षेत्र नम्वर २ का अन्य उम्मेदवारहरुमा हारको त्रास देखिएको बताएका छन्। सो क्षेत्रबाट जसपाका राष्ट्रिय अध्यक्ष उपेन्द्र यादव चुनावी प्रतिस्पर्धामा रहेका छन् ।
“अस्ति जनमत पार्टीका अध्यक्ष डा.सीके राउतले स्पष्ट रुपमा एउटा भिडियो सार्वजनिक गर्दै यहाँका प्रशासनले जसपाको पैसा बोक्छ भन्ने भ्रामक प्रचार गर्नुभयो ” उनले भने, “केही दिनअघि मात्रै एउटा धार्मिक समूहले धर्मकै नाममा हामीमाथि कुप्रचार गर्नुभयो ,सबैलाई थाहा छ जसपा समाजवाद स्थापना गर्ने अल्पसंख्यक समुदायको हितमा बोल्ने पार्टी हो ।”
जनमत पार्टीका अध्यक्ष डा.सीके राउतले भ्रामक प्रचार गरेको भन्दै उनले सो विषयमा पनि आफ्नो पार्टीले खण्डन गरिसकेको बताए ।
“अहिले सामाजिक सञ्जालहरुमा निर्वाचन आचार संघिता विपरित हामीलाई लक्षित गरेर अर्नगल प्रचारहरु भइरहेको छ” उनले भने, “विजित हुन लागेको उम्मेदवारमाथि संगठित भएर कुप्रचार गर्नु त परम्परा जस्तै देखिएछ । तर यो गलत हो ,निर्वाचनमा हारलाई पनि स्वीकार गर्नुपदर्छ ।”
त्यस्तै, यस क्षेत्रमा विकासको मुल फुटाउने र समानुपातिक समावेशीताको लागि लडिआउने एउटा सैद्धान्तिक पार्टी रहेको प्रवक्ता सुमनले बताए । “हामी अस्वस्थ प्रतिस्पर्धामाथि विश्वास पनि राख्दैनौं, त्यस्ता अस्वस्थ प्रतिस्पर्धा गर्न पनि चाह्दैनौं ।” उनले भने, “जात–पात र धर्म यी सबैभन्दा माथि उठेर हामी आसन्न निर्वाचनलाई एउटा स्वस्थ निर्वाचनको रुपमा सम्पन्न गर्न उत्प्रेरित छौं ।”
उनले अन्य उम्मेदवारलाई पनि त्यसरी नै स्वस्थ रुपमा चुनावी प्रचार गर्न आग्रह गरे । ‘प्रशासनलाई पनि स्वच्छ निर्वाचन गराउनमा सहयोग पुर्याउन आग्रह छ’, उनले भने, “अस्वस्थ प्रतिस्पर्धामा लागेका र धर्मका नाममा उन्मात फैलाउनेलाई कारवाहीको दायरामा ल्याउन पनि प्रशासनलाई आग्रह गर्दछु ।”
