क्रान्ति केन्द्र सम्वाददाता
जिल्ला प्रहरी कार्यालय,सप्तरीद्वारा सुरक्षा कार्ययोजना सार्वजनिक गरिएको छ । दशैं, तिहार, दिपावली, छठ पर्वको दृष्टिकोणले तयार पारेको सुरक्षा कार्ययोजना आज आइतबार एक कार्यक्रम बिच सार्वजनिक गरेको हो ।
चाडपर्व अवधिभर सवारी दुर्घटना,चोरी,डकैती, लुटपाट, आतसबाजी लगायत बिष्फोटक पदार्थको तस्करी, कालोबजारी, दुर्घटना न्यूनिकरण, झै-झगडा तथा हिंसात्मक घटनाहरू हुन नदिन योजना तयार पारिएको जिल्ला प्रहरी कार्यालय सप्तरीका प्रहरी उपरीक्षक अबि नारायण काफ्लेले जानकारी दिए ।
उनले जिल्लाभर कार्यरत अधिकतम् प्रहरी जनशक्ती, सवारी साधन लगायतका श्रोत साधनहरु परिचालन गरिने बताए । उनले करिब ७०० प्रहरी, १७ वटा ४ पाङग्रे र ३६ वटा २ पाङ्ग्रे परिचालन गरिने बताए ।
विभिन्न नाका र राजमार्गमा लुटपाट, चोरीका घटनाहरू हुन नदिन संवेदनशिल क्षेत्रलाई विशेष निगरानीमा राखी प्रहरी टोली परिचालन गरिने , सादा पोशाकमा प्रहरीपरिचालन र नियमित गस्तीद्वारा वर्जित क्रियाकलापहरू हुने स्थान पहिचान गरि प्रहरी कारबाही अगाडि बढाईने बताए ।
मदिरा पसल र भट्टीहरूलाई निगरानिमा राखि समयमा नै बन्द गराईने , मेला,पर्व तथा धार्मिक स्थलहरुमा बढी भिड हुने भएकोले महिला भक्तजनहरुको गरगहना ,नगद तथा जिन्सी सरसामानहरु चोरी,लुटपाट, थुतेर भाग्ने, यौन दुर्व्यबहार हुने सम्भावना रहेकोले सादा पोषाकमा महिला प्रहरी समेत परिचालन गरि सुक्ष्म रुपमा निगरानी तथा कारवाही गरिने जस्ता कार्ययोजनाहरु रहेको उपरीक्षक काफ्लेले जानकारी दिए ।
कार्यक्रममा सप्तरीका प्रमुख जिल्ला अधिकारी भुपेन्द्र थापा, प्रहरी नायव उपरीक्षक माधव प्रसाद काफ्ले, जिल्ला श्रमजिवि पत्रकारहरु तथा जिल्ला प्रहरी मातहत कार्यलयका ईन्चार्जहरुको उपस्थिती थियो। कार्यलय मातहतका कार्यलय ईन्चार्जहरुलाई आ-आफ्नो जिम्मेवार क्षेत्र भित्र शान्ति सुव्यवस्था कायम राख्न उपरीक्षक काफ्लेले भनेका थिए ।
—————————————————————————————
