प्रवेशकुमार बाबुल
राजविराजमा लोकतान्त्रिक समाजवादी पार्टी, सप्तरीका नेताकार्यकर्ताद्वारा विरोध प्रदर्शन गरिएको छ ।राष्ट्रपतिले दोस्रो पटक पनि नागरिकता विधेयक प्रमाणीकरण नगरेको कदम प्रति विरोध जनाउँदै उनीहरुले प्रदर्शन गरेका हुन् ।उनीहरु आज बुधबार पार्टी कार्यालयबाट टाउकोमा कालो पट्टी बाँधी, झण्डा बोकी चर्को नाराबाजी गर्दै जनआन्दोलन चौक सम्म पुगेका थिए । प्रदर्शनका क्रममा राष्ट्रपति विद्या देवि भण्डारी मुर्दावाद, नागरिकता विधेयक फिर्ता गर्न पाइदैन, राष्ट्रपति राजिनामा दे, जस्ता नारा लगाएका थिए। उनीहरूले राष्ट्रपति विद्या देवि भण्डारीको फोटो समेत जलाएका थिए । फोटो जलाउने क्रममा प्रहरीले रोक्न खोज्दा उनिहरु बिच घम्साघम्सी भएको थियो ।
लोसपाको स्थानीय नेता दिपेन्द्र चौधरीले “राष्ट्रपतिको काम देशमा अलोकतान्त्रिक काम गर्नु होइन्, राष्ट्रपति लोकतन्त्रको रक्षाको लागि बनाइएको हौं।” भन्दै आक्रोश प्रकट गरे ।
उनले विरोध गर्ने क्रममा प्रहरीको हस्तक्षेप प्रति दु:ख व्यक्त गरे । “प्रहरी हाम्रो सुरक्षाको लागि हो कि दमनको लागि ?, के प्रहरी मात्र राष्ट्रपति प्रधानमन्त्रीको सुरक्षाको लागि हो ?”उनले प्रश्न गरे । उनले नश्लवादी सोचका कारण नागरिक भएकोलाई पनि नागरिकताबाट बन्चित गर्ने संयन्त्र गरेको राष्ट्रपतिमाथि आरोप लगाए । राष्ट्रपतिलाई तुरुन्त राजिनामा दिनुपर्ने उनीहरुको माँग छ ।
