क्रान्ति केन्द्र सम्वाददाता ।
लोकतान्त्रिक समाजवादी पार्टीले संविधान जारी भएको दिन असोज ३ लाई विरोध दिवसको रुपमा मनाउने निर्णय गरेको छ । पार्टीका अध्यक्ष महन्थ ठाकुरले शनिबार एक प्रेस विज्ञप्ति जारी गर्दै पार्टीका सम्पूर्ण नेता कार्यकर्ता र शुभचिन्तकलाई पालिका स्तरसम्म विरोधका कार्यक्रमहरु गरि सो दिवस मनाउन आग्रह गरेका छन् ।
२०७२ असोज ३ गते जारी भएको संविधानमा पूर्ण रुपमा हाम्रो सहमति नरहेको बताउँदै नेपालको संविधान २०७२ को पूर्णताको निम्ति हामीले उठाएका मागहरु समेटी संविधान संशोधन नहुन्जेलसम्म हाम्रो विरोध रही रहने अध्यक्ष ठाकुरले बताएका छन् ।
असोज ४ गते सम्म राष्ट्रपतिबाट नागरिकता विधेयक प्रमाणीकरण नभए बाध्य भएर संघर्षमा जानु पर्ने परिस्थिति आउने उनले बताएका छन् ।
उनले सो विज्ञप्ति मार्फत सरकारले टिकापुर घटनामा मुद्दा लगाइएका रेशम चौधरी लगायतका मुद्दा खारेज गरि रहाई गर्ने गरेको निर्णय सकारात्मक रहेको बताएका छन् । टिकापुर जस्तै महोत्तरी घटनाको मुद्दा समेत खारेज गर्न सरकारसँग आग्रह गर्दै लाल आयोगको प्रतिवेदन सार्वजनिक गर्न समेत अध्यक्ष ठाकुरले माग गरेका छन् ।
