क्रान्ति केन्द्र सम्वाददाता
हिन्दूधर्मावलम्बी महिलाहरुले मनाउने कठोर पर्व जितिया आज (शुक्रबार)बाट शुरू भएको छ । प्रत्येक वर्ष भाद्र कृष्णपक्षको अष्टमी तिथिको दिन गरिने जितिया व्रत षष्ठी तिथिबाटै शुरु हुन्छ ।
जितिया पहिलो दिन आज नहाय खाइक गरिएको छ । नहाय खाइक दिन महिलाहरूले स्नान गरि आफ्ना स्वर्गवासी महिला पुर्वजको निम्ति नेवेद्य चढाई टोल छिमेकका महिलालाई खाना खुवाउने चलन रहेको सप्तरीकी एक ब्रतालु महिलाले बताइन् ।यसलाई पितरैन भोजन भनिने गरेको उनले बताईन् ।
आज साँझ महिलाहरुले मरुवा(कोदो) रोटी र माछ खाने चलन छ । शनिबार बिहानैदेखि निराहार बस्ने व्रतालुहरू टोकरीमा फलफूल, नरिवल, सागपात राखि नववस्त्रले छोपेर भगवान घरमा राख्ने । आइतबार बेलुका नुहाएर उनका छोराले त्यसमाथि बाट कपडा हटाई त्यसमा रहेका फलफूल भगवानलाई चढाएर पारण(ब्रत तोड्ने प्रसाद ग्रहण) गर्ने महिलाले बताइन् । यस व्रत अवधिभरि उनीहरूले एक बुन्द पानी समेत ग्रहण गर्न नसक्ने हुनाले यसलाई कठोर पर्व भनिन्छ ।
यो पर्व सन्तानको दीर्घायु लागि गरिने गरेको छ । यस पर्वको प्रभावले सन्तान माथि आएको संकट समेत टर्ने मान्यता रहेको छ ।
