क्रान्ति केन्द्र सम्वाददाता
दिगो विकास लक्ष्यलाई लक्षित गरी तिलाठी कोइलाडी गाउँपालिकाद्वारा सञ्चालन गरिएका क्रियाकलापहरुको अध्ययनका लागि टोलीले काम थालेको छ ।
संयुक्त राष्ट्र संङघीय विकास कार्यक्रम(युएनडिपी) को सहयोगमा तिलाठी कोइलाडी गाउँपालिकाको दिगो विकास लक्ष्य स्वेच्छिक पुनराबलोकन प्रतिवेदन तयारीको काम थालिएको हो । सो प्रतिवेदन तयारीका लागि युएनडिपीले ट्रान्सेन्ड भिजन नेपाल नामक गैर सरकारी संस्थालाई परिचालन गरेको छ ।
गाउँपालिकाको दिगो विकास लक्ष्य स्वेच्छिक पुनराबलोकन प्रतिबेदन बनाउन आवश्यक पर्ने परिमाणात्मक तथ्याङ्क, सूचना सङ्कलन लगायतको कार्यहरु भईरहेको गाउँपालिकाका अध्यक्ष अरुण कुमार मण्डलले जानकारी दिए ।
प्रतिवेदन तयारीको सन्दर्भमा शुक्रबार गाउँपालिकाका बिषयगत समितिका पदाधिकारी तथा कर्मचारीहरुसँग कार्यशालाको आयोजना गरियो । सो कार्यशालामा ट्रान्सेन्ड भिजन नेपालका रमेश प्रसाद मैनाली र उद्धव खनालले सहजीकरण गरेको गाउँपालिकाका कार्यक्रम अधिकृत राजेशकुमार झाले जानकारी दिए । सो कार्यक्रममा गाउँपालिकाका अध्यक्ष अरुण कुमार मण्डल, उपाध्यक्ष फुलकुमारी साह, प्रमुख प्रशासकीय अधिकृत सुरेन्द्र कुमार यादव तथा वडा अध्यक्षहरु दिनेश्वर मिश्र, कमलकुमार मण्डल, रमेश मुखिया, सत्यनारायण यादव तथा कर्मचारीहरुको सहभागिता रहेको थियो ।
