क्रान्ति केन्द्र सम्वाददाता
सप्तरी सहित मिथिला क्षेत्रमा आज(शुक्रवार) अनन्त चतुर्दशी पर्व मनाइएको छ । यस पर्वमा बिष्णु भगवानको प्रतिक अनन्तको पुजा गरि अनन्त हातको पाखुरामा बाध्ने चलन रहेको छ । यो पर्व प्रत्येक वर्ष भाद्र शुक्ल चतुर्दशी तिथिमा मनाउने परम्परा रहेको छ । टोल छिमेकमा सामुहिक रुपमा हुने अनन्त पुजा हर्षोल्लासका साथ यस बर्ष पनि मनाइएको छ ।
यस पुजामा घरमा जति सदस्य छन्, त्यतिवटा भगबान विष्णुको १४ नामको १४ वटा गाँठ दिएर धागोले बनाईएको अनन्त र प्रसादी बोकेर पूजा हुने पुजा स्थलमा जाने छिमेकी, आफन्तहरू मिलेर सामूहिक रूपमा पूजा गरेर अनन्त बाँध्ने गरेको एक स्थानीयले बताए ।
सत्य युगमा अमृतको खोजी गर्नका लागि समुद्र मन्थन गरिएको थियो । मन्थन गर्ने क्रममा अमृत सहित १४ रत्न फेला परेको दिनदेखि अनन्त पूजा गर्ने र हातको पाखुरामा अनन्त बाँध्ने चलन रहेको एक स्थानीय पंडितले बताए ।
१४ वटा रत्नको प्रतीकका रूपमा १४ वटा धागोले बनाइएको अनन्त महिलाले बायाँ र पुरुषले दाहिने हातको पाखुरामा वर्षभरि रक्षाका लागि लगाउने चलन रहेको पण्डितहरु बताउँछन् ।
धार्मीक सास्त्रका अनुसार जब पाण्डवहरूले जुवामा आफ्ना सारा सम्पत्ति र राजपाट हारेर वनमा कष्ट भोग्दै थिए, त्यतिबेला भगवान् श्रीकृष्णको आज्ञा अनुसार धर्मराज युधिष्ठिरले आफ्ना भाइहरू तथा द्रौपदीका साथ पुर्ण विधि विधानले व्रत गरि विधिपुर्वक अनन्तसूत्र धारण गरेका थिए । अनन्त चतुर्दशीको त्यसै व्रतको प्रभावले पाण्डवहरू समस्त सङ्कटहरूबाट मुक्त भएको थियो ।
आजको दिन स्थानीय महादेव मन्दिरहरूमा जल चढाउने भक्तजनहरूको घुइँचो रहेको थियो ।
