क्रान्ति केन्द्र सम्वाददाता
५६औं राष्ट्रिय साक्षरता दिवसको अवसरमा तिलाठी कोइलाडी गाउँपालिकाको राजेन्द्र देवकी माध्यमिक विद्यालयमा शैक्षिक सामग्री प्रदर्शनी मेलाको आयोजना गरियो । साक्षरता सिकाई क्षेत्रमा रुपान्तरण नाराका साथ आयोजित सो कार्यक्रममा विद्यार्थीहरुले विज्ञान, सामाजिक क्षेत्र तथा दैनिक रुपमा अध्ययनसँग सम्बन्धित शैक्षिक सामग्रीहरु प्रदर्शनीमा राखिएको थियो । सो कार्यक्रममा शैक्षिक सामग्रीको प्रदर्शनी अवलोकन गर्दै गाउँपालिकाका उपाध्यक्ष फुल कुमारी साहले मेलाले विद्यार्थीभित्रको प्रतिभा प्रष्फुटनमा सहयोग गरेको बताईन् । सेभ द चिल्ड्रेनको सहयोगमा तिलाठी कोइलाडी गाउँपालिका र सेभ द सप्तरीद्वारा आयोजित सो मेलाको गाउँपालिकाका उपाध्यक्ष फुल कुमारी साहले उद्घाटन गरिन् । दलान युवा क्लबका स्वयम्सेवकहरु समेतको सहभागिता रहेको सो अवसरमा शिक्षक तथा विद्यार्थीहरुले बनाएका शैक्षिक सामग्रीहरुको प्रदर्शनी गरिएको थियो । गाउँपालिकाका शिक्षा शाखा संयोजक राजेश कुमार झाले कक्षा कोठामा विद्यार्थीले सिकेका कुराहरुलाई शिक्षकहरुको सहयोगबाट शैक्षिक सामग्री निर्माण गराई विद्यार्थीभित्रको अन्तरनिहित प्रतिभालाई प्रष्फुटन गर्ने मद्त मिलेको बताए । उनले आगामी असोज १ गते विज्ञान र प्रविधिमा लगानीको विस्तार, समुन्नति र समृद्धिको आधार नाराका साथ दशौं राष्ट्रिय विज्ञान दिवस समेत भब्यताका साथ मनाइने जानकारी समेत दिए । राजेन्द्र देवकी माविका प्रधानाध्यापक दिपेन्द्र झाको अध्यक्षतामा आयोजित सो कार्यक्रममा शिक्षा विकास तथा समन्वय इकाईका विजय कुमार यादव, सेभ द सप्तरीका अध्यक्ष ध्रुव देव, दुर्गानन्द शर्मा लगायतका वक्ताहरुले मन्तब्य ब्यक्त गरे । सो अवसरमा दलान युवा क्लबका अध्यक्ष त्रिवेणी कुमार यादव, कोषाध्यक्ष कञ्चन यादव, राजन मण्डल, सरस्वती मूखिया लगायतकाले अतिथीहरुलाई मायाको चिनो प्रदान गरे ।
