क्रान्ति केन्द्र सम्वाददाता ।
तिलाठी कोइलाडी गाउँपालिकामा अवस्थित रहेको राजविराज भन्सार कार्यालयदेखि पूर्व कुनौली बोर्डरसम्म अबरुद्ध भएको सडक अहिले सम्म सञ्चालनमा आउन सकेको छैन् । राजविराज भन्सारलाई भारतीय बजार कुनौलीसंग जोड्ने एक मात्र सडक यहि हो ।
करिब डेढ महिना अगाडि खाँडो र जिता नदीमा आएको बाढीले भन्सार भन्दा करिब २०० मिटर पूर्वमा सडक भत्काएको थियो । यसै सडकले तिलाठी कोइलाडी गाउँपालिकालाई पूर्वी भेगमा रहेको छिमेकी नगरपालिका हनुमाननगर कंकालिनीसंग समेत जोड्ने गर्दछ । सडक भत्किएको केही दिनपछि स्थानीय बासिन्दाहरुले आफ्नै पहलमा माटो बोरा हाली पैदल हिँड्न मिल्ने गरी सडक मर्मत गरेका थिए ।
त्यस पश्चात सरकारी स्रोतबाट होम पाइप समेत राखि सामान्य मर्मत गरिए पनि उक्त सडक पूर्ववत सुचारु हुन सकेको छैन् । अहिले सो भत्किएको स्थानमा केबल पैदल यात्री, मोटरसाइकल र सिटी रिक्सा मात्र पार हुन सक्ने अवस्था रहेको छ ।
तर महिनौं बितिसक्दा सक्दा पनि त्यसको ठोस रुपमा मर्मत सम्भार नगरिएकाले अझै पनि चारपांग्रे गाडी सहज रुपमा गुड्न सकेको छैन् । उक्त सडक खण्डमा अहिले चारपांग्रे गाडी गुडाउनु जोखिमपूर्ण रहेको एक स्थानीय सवारी चालकले बताए ।
दशगजा क्षेत्रमा रहेको जीता नदीको वारी राजविराज भन्सार कार्यालय र पारी भारतीय कुनौली बजार रहेको छ । भन्सारलाई कुनौली बजारसंग सिधै जोड्ने कुनै पक्की पुल छैन् । जसका कारण भारतीय बजारबाट भन्सार कटाउन आउने मालबाहक गाडीहरु भारतीय बजार हुदैं करिब ३ किलोमिटरको दूरी पार गरेर हनुमाननगर कंकालिनी नगरपालिकाको मल्हनियाँ (कुनौली बोर्डर) हुँदै ल्याउनुपर्ने बाध्यता छ ।
अहिले यो सडक भत्किएर बाटो अबरुद्ध भएपछि त मालबाहक गाडीलाई भन्सारसम्म पुग्न हनुमाननगर कंकालिनी नगरपालिकाको मल्हनियाँ गाउँको भित्री सडक भएर जाने बाटो छ वा हनुमाननगर बजार हुँदै सकरपुराको बाटो भएर करिब १०/१२ किलोमिटरको दुरी पार गरेर जानु पर्ने बाध्यता छ । यसले भन्सारको राजस्व संकलनमा प्रत्यक्ष असर पारेको छ भने राजश्व छलीलाई समेत बढाबा मिलेको स्थानीय बासिन्दाहरूको भनाई रहेको छ ।
भारतीय सीमा क्षेत्र दशगजासंग जोडिएको सडक भएकाले सुरक्षा संवेदनशीलताको हिसाबले समेत खतरापूर्ण रहेको बोर्डरका एक सुरक्षाकर्मीले बताएका छन् । उक्त सडकमा सो स्थानमा पुल निर्माण गर्ने काम बाँकी रहेकाले सडक निर्माणको काम समेत भएको छैन् । ठेकेदार कम्पनीले सो भन्दा पूर्व बोर्डरसम्मको सडक निर्माण कार्य सम्पन्न गरे पनि पुलको कारणले यो स्थानमा काम गरेको छैन् ।
भारतीय छिमेकी बजारसंग हुने दैनिक व्यापार र भारतसँग रहेको रोटीबेटीको सम्बन्धका कारण सडक अबरुद्धले निकै नै समस्या सिर्जना गरेको तिलाठी कोइलाडी गाउँपालिका वडा नम्बर १ का अध्यक्ष दिनेश्वर मिश्रले बताए । ठेकेदार कम्पनीले चाँडो सडक सुचारु गर्ने व्यवस्था मिलाउन उनले सम्बन्धित निकायसंग आग्रह समेत गरे ।
