क्रान्ति केन्द्र सम्वाददाता ।
जनता समाजवादी पार्टी (जसपा) नेपालका सप्तरी जिल्लाको पूर्व जिल्ला सचिव तथा जिल्ला कार्यकारिणी सदस्य चितरन्जन यादवले पार्टी परित्याग गरि नेकपा (एमाले) मा प्रवेश गरेका छन् ।
आज नेकपा (एमाले) सप्तरीको पार्टी कार्यालयमा आयोजना भएको एक कार्यक्रममा उनले पार्टी प्रवेश गरेको हो ।
पार्टी प्रवेश गर्दै यादवले भने “आज देखि ६ बर्ष पछि पुन: आफ्नो घर नेकपा(एमाले)मा फर्केको छु।” ६ बर्ष सम्म जसपा नेपालमा काम गर्दा जसपा नेपाल का साथीहरुलाई मबाट हुन गएका त्रुटिहरुलाई अन्यथा नलिई दिन उनले आग्रह समेत गरेका छन् ।
आज भएको पार्टी प्रवेश कार्यक्रममा नेकपा (एमाले) का नेता सुमन राज प्याकुरेल सहित सप्तरी जिल्लाका नेताहरुको उपस्थिति रहेको थियो ।
नेता यादव पहिलो स्थानीय तहको निर्वाचनमा तत्कालीन वेल्हि चपेना गाउँपालिका ( हाल राजगढ गाउँपालिका) मा तत्कालीन संघिय समाजवादी पार्टी नेपाल हालको जसपा नेपालबाट गाउँपालिका अध्यक्ष पदमा चुनाव लडेका थिए । यसपटक स्थानीय तहको निर्वाचनमा पार्टीले टिकट नदिएपछि उनी चिढिएका थिए ।
आगामी मंसिर ४ गते हुने आसन्न निर्वाचनलाई मध्यनजर गरेर अहिले पार्टी परिवर्तन गर्ने लहर चलेको छ ।
