क्रान्ति केन्द्र सम्वाददाता ।
गत वैशाखमा सम्पन्न भएको स्थानीय तहको निर्वाचन पछि सप्तरी जिल्लाको अधिकांश स्थानीय तहहरुका प्रमुख प्रशासकीय अधिकृतहरुको व्यापक सरुवा भएको छ । सप्तरीमा ९ वटा गाउँपालिका र ९ वटा नगरपालिका गरि जम्मा १८ वटा स्थानीय तह रहेका छन् । जिल्लामा रहेको १८ स्थानीय तह मध्ये १० स्थानीय तहको अधिकृतहरुको निर्वाचन पश्चात सरुवा भइसकेको छ । स्थानीय तहको निर्वाचन पछि सप्तरी जिल्लामा प्रमुख प्रशासकीय अधिकृत सरुवा नभएको गाउँपालिका रुपनी र बलान बिहुल मात्र हुन् ।
बलान बिहुल गाउँपालिका पनि निमित्त प्रमुख प्रशासकीय अधिकृतको भरमा कामकाज गरि रहेकाले अधिकृत सरुवा भइ आउने सम्भावना प्रबल रहेको स्रोतले बताएको छ । त्यस्तै सरुवाको खोजीमा अधिकृतहरु मन्त्रालय धाइ रहेकाले रुपनी जस्तो सुगम ठाउँमा आउने कयौं आंकाक्षी रहेकाले त्यहाँ पनि सरुवा हुने सम्भावना बढी नै रहेको स्रोतले बताएका छन् ।
सप्तरीको ९ नगरपालिका मध्ये सुरुङ्गा नगरपालिकामा मात्र दरबन्दी बमोजिम उपसचिवले प्रमुख प्रशासकीय अधिकृतको जिम्मेवारी सम्हालेको छ । जिल्लाका अन्य नगरपालिकाहरु निमित्तको भरमा चलेको छ । सप्तरीमा निर्वाचन पश्चात अधिकृत सरुवा हुने नगरपालिकाहरुमा राजविराज, हनुमाननगर कंकालिनी र शम्भुनाथ नगरपालिका रहेको छ ।
गाउँपालिकामा नेपाल सरकारका शाखा अधिकृत र नगरपालिकामा नेपाल सरकारका उपसचिवले प्रमुख प्रशासकीय अधिकृतको जिम्मेवारी सम्हाल्ने प्रावधान छ । तर अधिकांश स्थानीय तहहरु निमित्त अधिकृतको भरमा चलेको छ । प्रमुख प्रशासकीय अधिकृतको कार्यक्षेत्र विशुद्ध प्रशासनिक र व्यापक भएकाले यसको व्यवस्थापन प्रशासन क्षेत्रका कर्मचारीहरुले नै गर्न सक्ने मान्यता रहेको छ । तर स्थानीय तहमा विभिन्न दवाव र प्रभावका कारण शिक्षा, स्वास्थ्य, प्राविधिक सेवाका कर्मचारीलाई प्रमुख प्रशासकीय अधिकृतको जिम्मेवारी दिने गरेको कर्मचारी भित्रैबाट गुनासो आउने गरेको छ ।
जनप्रतिनिधिहरुले आफ्नो अनुकूल काम गर्ने कर्मचारीलाई मात्र प्रमुख प्रशासकीय अधिकृत स्वीकार गर्ने गरेको विगतदेखिको परम्परा पुनः देखिएको स्थानीय तहका कर्मचारीहरुले बताएका छन् । नवनिर्वाचित जनप्रतिनिधिहरु मन्त्रालय गएर मन मुताबिक रोजी रोजी अधिकृत सरुवा गरेर ल्याएका छन् । निर्वाचनमा पराजित प्रतिनिधिहरु पनि आफ्नो प्रभाव देखाउन अधिकृत सरुवामा अवरोध गर्दा कतिपय स्थानीय तहमा पटकपटक सरुवा रद्द भएको छ ।
सप्तरी जिल्लामा अहिले भएको सरुवा पालिका प्रमुखहरुका सामु ट्राइल पिरियड नै रहेकाले यसमा अझै स्थिरता नरहेको स्थानीय तहका एक अनुभवी अधिकृतले बताए ।
पुरानो जनप्रतिनिधिहरुले गरेका काम मध्ये कयौं बाँकी बक्यौता दिनु पर्ने भुक्तानीहरुको बोझ र नवनिर्वाचित जनप्रतिनिधिहरुको नयाँ नयाँ जोेशका विच सरुवा भएर आएका प्रमुख प्रशासकीय अधिकृतहरुलाई काम गर्न सहज नहुने उनको कथन रहेको छ ।
