क्रान्ति केन्द्र सम्वाददाता ।
राजविराज नगरपालिकाले नारीहरुको महान चाड हरितालिका तिज र चौरचन पर्वको अवसरमा भोलि सार्वजनिक विदा दिने निर्णय गरेको छ ।
आज एक सूचना प्रकाशित गरी नगरपालिकाकी कार्यबाहक नगर प्रमुख इसरत परबिनले सो घोषणा गरेकी छिन् । यस पर्वको अवसरमा सम्पूर्ण महिला दिदीबहिनी तथा नगरबासी एवम् जिल्लाबासीमा शुभकामना दिएकी छिन् ।
कार्यबाहक नगर प्रमुख परबिनले २०७९/०५/१४ गते राजविराज नगर कार्यपालिका अन्तर्गत रहेका सम्पूर्ण कार्यालय, शिक्षण एवम् स्वास्थ्य संस्थाहरु बन्द रहने बताएकी छिन् ।
तर नेपाल सरकारले हरितालिका तीजको अवसरमा देशैभर भोलि महिला कर्मचारीहरुलाई मात्र विदा दिएको छ । घरमा महिलाहरु भोलि व्रत बस्ने भएकाले चौरचन पर्वमा सघाइ दिन यो विदाले अब सजिलो भएको राजविराज नगरपालिकाका एक कर्मचारी खुशी हुँदै बताए ।
शम्भुनाथ नगरपालिकाका नगर प्रमुख जितेन्द्र प्रसाद गुप्ताले पनि एक सुचना जारी गर्दै हरितालिका तिज तथा गणेश चतुर्थीको अवसरमा भदौ १४ गते मंगलबार विदा दिने घोषणा गरेका छन् । भोली शम्भुनाथ नगर कार्यपालिकाको कार्यलय, मातहतका बिषयगत शाखा ,वडा कार्यलयहरु तथा विद्यालयहरुमा स्थानीय विदा दिएको उनले बताए ।
यससंगै तिलाठी कोइलाडी गाउँपालिकाका निमित्त प्रमुख प्रशासकीय अधिकृत शैलेश कुमार मिश्रले पनि आज एक सूचना जारी गर्दै भोलि गाउँपालिका अन्तर्गतका सम्पूर्ण कार्यालयहरु, विद्यालय तथा स्वास्थ्य संस्थाहरु बन्द रहने बताएका छन् ।
