क्रान्ति केन्द्र सम्वाददाता।
जनता समाजवादी पार्टी (जसपा) नेपाल सिरहामा पार्टी भित्र आन्तरिक द्वन्द्व चर्किदै गएको छ । गत स्थानीय तहको निर्वाचनमा टिकट वितरणमा देखिएको विवाद पुनः सतहमा आएको छ । सिरहाको कल्याणपुर नगरपालिका र सखुवानन्कारकट्टी गाउँपालिका लगायतका स्थानीय तहहरुमा जसपा नेपालबाट दोहोरो उम्मेदवारी परेदेखि नै जिल्लामा पार्टी भित्र विवाद बढ्दै गएको एक नेताले बताए ।
त्यसपछि जिल्लामा अलग अलग गुट उपगुटको भेला तथा बैठकहरु हुँदै आएको उनले बताए ।
जसपा नेपालको राजनीतिक समितिको मिति २०७९ भदौं १ गते देखि ३ गते सम्म काठमाडौंमा सम्पन्न बैठकको निर्णय तथा मर्म र भावना विपरित जसपा नेपाल सिरहाको जिल्लाको बिस्तारित बैठक बसेको पार्टीको राजनीतिक समिति सदस्य तथा प्रदेश सांसद सुरेश मण्डलले आरोप लगाएका छन् ।
प्रदेश सांसद मण्डलले सामाजिक सञ्जाल मार्फत मिति २०७९ भदौ ११ गते बसेको समिक्षालय बैठकमा जिल्लाका एकमात्र प्रतिनिधि सभा सदस्य तथा पार्टीको कार्यकारिणी सदस्य माननीय राजकिशोर यादव, पार्टीको राजनीतिक समिति सदस्य तथा प्रदेश सांसद लगायत हाम्रो केन्द्रीय सदस्य साथीहरु, प्रदेश समिति सदस्य साथीहरु लगायत कसैलाई जानकारी समेत नदिई एक पक्षीय बैठक बसेको प्रति गम्भीर ध्यानाकर्षण भएको जनाएको छ ।
“सो हाम्रो उपस्थिति बिनाको बैठकबाट नै हामी दुबै जना निर्बाचित रहेको सिरहा निर्वाचन क्षेत्र नम्बर ४ को बैठक बिना कुनै छलफल र जानकारी बिना तोकिनु दुर्भाग्य हो । हामीसँग सल्लाह र छलफल नगरी राखिएको बैठकमा हाम्रो सहभागिता हुनेछैन् र त्यसको निर्णय हाम्रो लागि मान्य हुनेछैन।” उनले स्पष्ट गरेका छन् ।
